الجمعة، ٣٠ مايو ٢٠٠٨
منة عرفة: ماما بتقول إن الأعداء بيعتمدوا علي غازنا.. وأنا ضد بيعه لإسرائيل
كتب محسن سميكة
رغم صغر سنهم وعدم إدراكهم لكثير من التفاصيل المتعلقة بالموضوع، فإنهم رفضوا بالإجماع تصدير الغاز إلي إسرائيل، واعتبر كل من: منة عرفة وهادي خفاجة ويوسف عثمان تصدير الغاز إلي إسرائيل قضية أمن قومي.
منة قالت لـ«المصري اليوم»: «الغاز ده خير بلدنا لينا أحنا كلنا.. صغار وكبار.. ومش من حق الحكومة تتصرف فيه ونفسي أقول لهم إن أي شيء تأخذه إسرائيل مننا هتحوله كده بقدرة قادر إلي قنبلة في وجه إخواننا الفلسطينيين، وأنا ماعرفش إيه أهمية الغاز ده لكن ماما بتقول إن الأعداء دول بيعتمدوا عليه في توليد طاقتهم بنسبة ٢٠% بصراحة أنا مع حملة رفض بيع الغاز وممكن أعمل أي حاجة عشان أساعدهم».
وأضاف هادي خفاجة: تصدير الغاز مش معناه أننا بنطبع مع إسرائيل لأن التطبيع موجود منذ فترة طويلة، من خلال زيارات المسؤولين المصريين لإسرائيل والصفقات التجارية المشتركة.. من غير زعل لازم نوقف التطبيع مع إسرائيل وأمريكا وتركيا وكل الدول التي تعادي العرب والمسلمين.
أما يوسف عثمان فقال: «يا جماعة أنا لسه صغير بس فاهم إن اللي بيتصدر لإسرائيل بيستخدم ضد دولة عربية إسلامية اسمها فلسطين، وكده مصر بتقول للعالم أنا والغريب علي ابن عمي، وبتعترف بكيان غير حقيقي، ودولة مش موجودة اسمها إسرائيل، هو احنا خلاص نسينا ضحايا بحر البقر ومذبحة قانا؟».
الاشتراك في:
تعليقات الرسالة (Atom)
ليست هناك تعليقات:
إرسال تعليق